Mesfushori brazilian, Fred, ka arritur në fushën e trajnimit të Manchester United për një kontroll mjekësor, përpara transferimit të tij te klubi anglez.

Ylli i Shakhtar Donetsk pritet të nënshkruajë një marrëveshje me vlerë rreth 52.5 milionë paundë gjatë 24 orëve të ardhshme, me presidentin e tanishëm të klubit të tij, Rinat Akhmetov, duke këmbëngulur se do të marrë një shumë rekord për klubet e Ukrainës.

Dhe Fred ishte i lumtur që arriti në kompleksin e trajnimit të Manchester United të hënën në mëngjes, ku u paraqit para stafit mjekësor. Ai ka gjasa të firmosë kontratë katërvjeçare me klubin nga “Old Trafford”, me opsion për një sezon të pestë.

25-vjeçari erdhi si zëvendësues në fitoren e Brazilit ndaj Kroacisë në një miqësore të luajtur në shtëpinë e Liverpool, në “Anfield”, të dielën, dhe më pas shkaktoi një trazirë, duke shpërndarë urimet e tij përmes një “tëeet” për shokët e tij të skuadrës nga një vendndodhje, që tregonte Manchesterin.

Shfaqja e tij e së dielës ishte e teta për “Selecao”, ndërsa tashmë është përfshirë në listën prej 23 lojtarësh të trajnerit Tite për finalet e Kupës së Botës, këtë verë. Mesfushori ka kaluar pesë vitet e fundit me Shakhtarin, ndërsa e ka filluar karrierën e tij profesionale me Internacional, në atdheun e tij.

Ai kishte qenë më parë objektiv i Manchester City, por skuadra e Pep Guardiolës e tërhoqi interesin e saj në janar. Fred duket se do të bëhet nënshkrim i parë i Manchester Unitedit këtë verë, me Jose Mourinho, gjithashtu, që do të zyrtarizojë marrjen nga Porto, gjatë ditëve të ardhshme, të Diogo Dalot.